النهاردة 10/2/2008 سادس بطولة مصرية افريقية وبجدارة وتعب وجهد

فرحانة وطايرة ومحدش قدي النهاردة

أحاــــى لحظة بجد في الكــون لحظة الفرحة المصرية

مبــــــــروووووووووووك يامــصر.....يابلدي أنا

تفتكر احنـــا صح....والا

هو احنا صح لو فكرنا نخلع ونشيل ايدينا من كل حاجة

هو احنا صح لومشينا جنب الحيط ونفضنا لكل اللي بيحصل حوالينا

هو احنا صح لو بطلنا نشارك في كل رأي

هو احنا صح لوشوفنا الحرامي بيسرق وقلت وأنا مالي طالما مش أنا اللي بيتسرق

هو احنا صح لو لقينا أولادنا بيجوعوا ويتشردوا هنا وهناك وكل اللي بنعمله اننا نمصمص شفايفنا حسرة

هو احنا صح لو سيبنا أمن الدولة بيسرق أمن الدولة من غير احم أو دستور

هو احنا صح لوفكرنا في اننا نهرب في أحضان بلاد برة بس علشان بس مش قادرين نواجه

هو احنا صح لوضحينا بشوية من مبادئنا علشان نحقق حق مشروع

هو احنا صح لوفكرنا أوي في نفسنا وفي سبيلها ندوس اللي حوالينا من غير رأفة

هو احنا صح لو بطلنا نحب ونفكر بشوية مشاعر

هو احنا صح لو ايه...؟

أنا بطلت أشوف الألوان من كتر مابقيت أشوف كاروهات الأبيض والأسود

بطلت أقتنع أن فيه مثالية في المشاعر زي زمان..وماتقولوش قول للزمان ارجع أو ماترجعش

أنا بجد من كتر لغبطتي نفسي بس أعرف الصح والغلط ليهم أسامي تانية ماعرفتهاش...والا

والا الزمن دة مش من مصطلحاته الكلمات ديه

ولو الزمن غيّر من معاني كلماته ..فين الناس اللي لازم تعلمنا المصطلحات الجديدة

قبل مانبقى أمة مجهولة الهوية ...وكمان المعاني والكلمــــــات